"قِصتي مع الانتِخابات والكورة.. بحال ميسي بحال رونالدو بحال الرّاجا بحال الوداد..!"

جا الوقت لي نحس فيه شخصيا بالناس لي ماعندهمش مع كورة، لي ماكيفهموش فقوانين اللعبة وماكيفرقوش بين ميلان ونيس، ماكيعرفوش علاش ميسي كايلعب بجوج تونيات واحد للبارصا (سابقا) وواحد للأرجنتين، كايشوفوه مع منتخب بلادو كايقول ليك ياك هو كايلعب فالسبليون، وكاتلقا راسك مافيكش الوقت لي تضيع باش تجاوب وتشرح.

جا الوقت لي نحس بالناس لي ماكيعرفو فالكورة غير امتى لاعب المنتخب ويقدرو يسولو غير على النتيجة، ولا يقولو ليك واش باقي الزاكي مدرب، وعلاش الشماخ ماكاينش، وفاش كايسالي الماتش يقول ليك، تا اش كاتعطيك هاد الكورة، هادشي علاش ماعنديش معاها غير تضياع الوقت.

حسيت بلي كايستهزأ بالانتماء وكايقول لشي واحد متعصب لفرقتو: "والله ماعندك العقل"، خاصة فاش كايكون فتحدي مع طرف ماكيبغيش يخسر قدامو، فاليوم حسيت بيهم صراحة وانا كانشوف ألوان ورموز الأحزاب، وماكنعرفش القيمة بيناتهم ولا الفرق وكانقول كلهم بحال بحال.

صحيح كاينا رموز أكثر شيوعا من غيرها، كاتبان بزاف، وكاينا شخصيات حتى هي أكثر بروزا من غيرها، لذلك كانعرفوهم حنا العامة، لكن كايبان لينا كاشي فحال فحال، تماما، كيفما هادوك لي كايشوفو رونالدو وميسي بحال بحال.

كانشوف التطاحنات لي بين أنصار هاد الحزب وأنصار الحزب الآخر، وكانقول واش هادو من نيتهم؟ ياك باغيين المصلحة للبلاد، فعلاش هاد العدوانية المعنوية، مادام كاتهمهم المصلحة العامة، وفاش كانشوف الاتهامات المتبادلة والاستهزاء ببعضهم كانقول حنا صحاب الكورة لينا الدوا، كانشدو فبعضياتنا فحاجة زايدة ناقصة، وكاتتطلب فائز واحد فالأخير لأنها لعبة، وهادو علاش مضاربين، واش ماعرفوش الصالح والطالح بيناتهم غايعرفوه للوطن ككل؟ وشوية كانرجع ونقول انا مافاهم والو خليني فداكشي لي كانعرف او لي كانتخيل بأنني كانعرف ليه أحسن.

من بين الشمتات لي حسيت بيهم فحياتي وندمت عليهم هو الثقة لي درت فواحد الحزب عطيتو صوتي بحماس جوج مرات، وكنت  كانتوهم حتى انا الصلاح معاهم، الساعة اكتاشفت بأنني كانتوهم، تماما كيف هاداك لي كايقول ليك بحال الراجا بحال الوداد كلشي خوت، حتى هوما بالنسبة ليا كلهم خوت، من بعد الديربيات غايتلاقاو اللعابة ويضحكو بيناتهم واخا يخسرو بنتيجة ثقيلة، ويقدر كاع يبدل التوني من غريم لآخر وعادي، وانت كاتتخيل أنه كايشوف الكورة فحالك، وهو عندو شوفة مختلفة، تماما كيفما أنا كنت كانتخيل السياسة.

هاد الانتخابات قررت نعطي صوتي لشخص ماشي لحزب باش مانندمش، ماعمرني قاطعت وشخصيا ماكنحبذش فكرة المقاطعة لأنها كاتضعف الرأي الشامل ديال المواطن الحيادي، لذلك غانقلب شخصيا على فرد من الحي لي على الأقل كانعرفو صادق حتى لا ساهمت معاه بصوتي، غانحسبها تعاونت مع ولد دربنا، ولاةتلاقيتو نتحاسب معاه هو (هادشي ايلا تلاقيتو) حسن مانعمر راسي بشي حاجة مافاهم فيها والو، ولي ديجا خذلاتني جوج مرات قبل، تماما بحال هادوك لي دوينا عليهم فالاول ماعندهمش مع كورة، كايقول ليك فاش غايبدا المونديال وانت تأهلتي بزز، المغرب غاي يدي كأس العالم علاش لا، كاتشوف فيه بنص عين وكاتشرب ديك الطاليان نص طوبة بشوية وكاتقول ليه: كاس العالم ديال الطواجن، را ضربها عليك بوحدوز سير كول المسمن وتكمش ماتبقاش تدوي فشي حاجة ماكتعرفهاش.