فتحت "البطولة" الباب أمام متابعيها من أجل سرد قصصهم التي عايشوها مع المنتخب المغربي والمونديال، لنختار لكم البعض منها على هامش مشاركة "أسود الأطلس" في نسخة 2022.

وفيما يلي أحد قصص متابعينا: (محمد أبقا)

ملي بدا كأس العالم وانا والواليد كل نهار كانجلسو نتفرجو فالماتشات وبطبيعة الحال الواليدة كايطلع ليها الدم لحقاش كاتبغي تفرج فالمسلسلات ومكتقدرش لأنه كايكونو 4 ديال الماتشات فنهار يوميا

ولبارح قبل ما يبدا الماتش ديال المنتخب جلسنا ثاني أنا والواليد متبعين الأحدات ديال كأس العالم بينما يبدا الماتش د المنتخب، والواليد قال للواليدة عمري لينا شي براد د أتاي وهي تقوليه أنا صافي راه مليت من هاد الماتشات كل يوم، أنا ما بقيتش كاع كانتفرج فهاد تلفازة بسبابك نتا وولدك صافي حياتك كلها غير كورة

الواليد توشاتو الهضرة وهو ينوض وطفا التلفازة وهو يقول ليها أنا حياتي كلها ديالك وماعنديش شي حاجة حسن منك فهاد الحياة أما هاد الماتشات راه غي كاندوز بيهم الوقت

مشات الوليدة مسكينة سدات عليها فالكوزينة شحرات لينا واحد البراد د أتاي وصايبات لينا واحد الكيكة وحطات لينا كلشي وجالسة تفرج معانا فالماتش د المنتخب وتيسرات القضية