بين تألق بونو والاعتِداء على بدر.. "عوّل على راسك وآمن بإمكانياتك أمّا الباقِي غير رِوايات..!"

الوقت لي بونو تألق أمام أفضل لاعب فالعالم وماخلاهش يوصل للشبكة، وخطف الأضواء مرة أخرى كيفما عودنا هاد العام ولي قبلو مع إشبيلية، تعرض وليّد صغير عندو 16 سنة من نفس المدرسة لي جابت بونو لاعتداء بالسلاح الأبيض، يقدر ينسف ليه الكاريير ديالو لا قدر الله، وهاد الوليد لي سميتو بدر، ممكن يكون بونو جديد من بعد 10 سنين مثلا علاش لا.

هاد الصدفة الزوينة الخايبة جات باش تورينا تاني حقيقة الواقع المُعاش، حقيقة كاتقول لابغيتي شي حاجة فهاد البلاد، خاصك دير مجهود مضوبل وماتعوّل على حد، فكل التفاصيل، الصغيرة والكبيرة، المهمة والتافهة.

كآلاف المواهب والطاقات فالكورة وفغير الكورة بقات تابعا الوهم حتى فات الفوت، يا يأسات يا كبرات يا "عوجات الرويد"، عوّل على الله وراسك، ولا كاينين شي واليدين بوس يديهم وطلب رضاهم، أما الباقي كلشي روايات كيفما قال السي بلال.

نفرضو أن بونو"الله يحفظو من كل شر"، هو لي تعرض لهاد الاعتداء المماثل قبل 15 سنة، واش كنا نقدرو نهضرو عليه اليوم؟

علاش غانمشيو بعيد، اشنو دايرين مع بونو والنصيري وحكيمي وغيرهم دابا من السفراء ديالنا الرياضيين لي متألقين خارجيا، ودايرين خدمة نقية فتلميع صورة البلاد وإعطاء انطباع زوين على الشاب المغربي فوجه الطالياني والسبليون، فوقت ولات كاتهمنا بزاف صورتنا عند الآخر فشتى المجالات، وعلاش مامستغلينش هادشي كما ينبغي؟ ولا "الشان" أهم وأعمق..؟!

المهم، الله يشافيك بدر، والله يقويك بونو..