الركراكي: "بزَّاف ديال الناس ما تَاقُوش فيَّا ولكن غير ديرو النِّية"

أكد الناخب الوطني وليد الركراكي، أنه سعيد بفوز المنتخب المغربي على الكاميرون، والتأهل إلى نصف نهائي كأس أمم أفريقيا، لأول مرة منذ سنة 2004 (22 عاما).

وقال وليد بعد المباراة: "بغيت نشكر اللاعبين. ديما كانقول نحن عائلة، واخا بزَّاف د الناس ما تَاقوشْ فينَا وماتاقُوش فيَّا ولكن ماشي مشكل. حنا لاعبين على لبلاد وعلى الجمهور لي باغي المغرب يكون الفوق. فحال لي قلت جِينا باشْ نكتبو التاريخ. قلت ليهم 36 سنة مَاشافُوش المغرب في ثمن نهائي كأس العالم، شافُوها معانا، و20 سنة ماشافوش المغرب فنصف نهائي كأس أفريقيا دْرناهَا اليوم".

وأضاف: "مزَال ما درنَا والو، خاصّْنا نبقَاو متواضعين ونخلِّيو رجلينا فوق الأرض. حنا عَارفين شْكانديرُو وهنيئا للاعبين عطَاو كلشِي، باغيين يفرّْحو الشعب. 4 سنوات وحنَا عَايشِين لحظات صعبة، ولكن أهم شيء أننا بْقينَا متَّحدين واليوم كانت أمسية جميلة للكرة المغربية".

وعن تألق اللاعبين اليوم، قال الركراكي: "الحمد لله حيت مَاكانسمْع لتاشِي واحد، رَاسي قَاصحْ. الحمد لله حنا غاديين، ديرو النية وبْقَاو معَانا، إلى مَاكانتْش النِّية غَاتكُون الأمور صعيبة. خاصنا نثيقو فالناس لي خدامين. أنا كنت لاعب ومساعد، ودْوزنَا سنوات سوداء في المنتخب. يمكن الدراري الصغار (الجيل الصاعد) شَافونَا فنصف نهائي كأس العالم، يْصحابهُم هادِي هيا الكورة ديال المغرب. لقد مررنا بأوقات صعبة، والآن علينا الاستمتاع بهذه اللحظات وبداية التحضير لتقديم مباراة كبيرة في نصف النهائي، ولكنني سعيد من أجل الكرة المغربية. دَابا ما بْقاش الضّْحك باغِي غير نْربحُو".