ماتقراش هادشِي ماعندُو علاقة بْكورَة: "سْقطت فالْبَاك وتحاشْمت مْعَ الدّار..!!"

محمد زايد (البطولة)

توققت أو غانتوقف عن ممارسة أي نشاط يخص الجمعية ديال الدرب لمدة عام، ولي ماغاتأثرش لا على خدمتي لا على أدواري فالدار عندي، ولا حتى غايمنعني ندخل للدرب وقتما بغيت، الحاجة الوحيدة لي تمنعت منها هي مانشاركش معاهم فداك النشاط ديال نسقيو الجردة ونحيدو الزبل لي كانديروه مرة مرة فصباحات الاحد، علما أن هاد التوقيف ماغايأثرش على علاقتي بالدراري ولاد الدرب ولا أعضاء الجمعية، عندي الحرية نهضر معاهم وقتما بغيت فاش مابغيت.

الصراحة مزيانة ليا أنا هاد القضية، نغبر شوية عليهم وعلى مالين الدار لي زبلتها معاهم غير هاد السيمانة، معولين عليا ننجح فالباك، كل مرة كانقول ليهم غانجيبو، وهاد العام عمرت ليهم راسهم بيه، جبت فكلشي مزيان، وفاللخر صدقت جايب صفر فآخر مادة ولي سااااااهلة، وليت محشم معاهم، وماعندي باش نواجههم.

آشنو غانقول ليهم؟ را عمرت عليكم الشوارج وفاللخر مانجحتش، ولا خوا بيا "السكفاندرو" فالتكيات (التكيات هو النقلة بالكيت) ولا ماكنت مبيرباري مزيان وكنت مامفاهمش مع أستاذ الرياضيات، المادة لي عليها العمدة و مابغيتش نبين ليكم، وشاك فيه هو لي صاكني وبريبارا معايا وفاللخر تحط داكشي لي ماخدمتش انا وياهبغا يتتقم منا، والمشكلة كانخلصوه مزيان ملي بدا معايا، هاد الباك والباك لي فات، وصلنا معاه مؤخرا ل1200 درهم فالشهر، وماشي 800 درهم كيف كايحسابو الجيران، واشنو يعرفو 1200 درهم كانعطيوها غير لأستاذ د الرياضيات نوليو فشد ليا نقطع ليك.

من بعد هاد الحريرة كاملة اللهم الدار وحتى العائلة نبقا فيهم حيت توقفت من النشاط مع الجمعية (لي ماغاتزيد ماغاتنقص)، ولي جات فظرفية مزيانة ليا بزاف (وبلا مايسولني شي حد واش انا فخباري لافير قبل) ولا يبداو يقولو ليا حكا عمرتي لينا راسنا وفاللخر ساقط بصفر فالمادة اللخرة، وجبتي الذل للعائلة، حيت ماعمرها طرات عندنا فالتاريخ، خصوصا غانقارن ليهم البلان لي وقع مع الدري ولد الصفقوسي لي رونها فالجمعية فواحد النشاط هو وخوتو وماخداش هادشي لي خديت انا، لي مادرت والو غير نزلت هضرت مع واحد خونا، هاكا غاتطفا العافية، ونقوليهم حكرونا خصوصا أن القرار مزال ماشي رسمي..

آش بان ليكم معايا ولا نعوج الكابية؟

للتواصل مع الكاتب: m.zaid@elbotola.com